متابعة : أيوب الملولي
واحد الرقم كيدور فالكواليس وكيطرح أكثر من سؤال: 196 قصريّة ديال الرفيسة، فعراضة قيل إن النائب البرلماني عبد النبي العيدودي نظمها داخل منزله وجمع فيها عدداً من الأشخاص.
طبعاً، إلا كانت هاد المعطيات صحيحة، فالسؤال اللي كيطرح راسو بقوة هو:
واش الانتخابات كتربح بالبرامج والأفكار والحصيلة؟
ولا ولات كتربح بعدد القصاري والولائم؟
حيت الرفيسة كتسخن، والقصريّة كتسالي، والدجاج كيتاكل…
ولكن صوت المواطن ماشي قصريّة كتتحط فوق المائدة وكتتحيد من بعد.
الانتخابات مسؤولية، والصوت أمانة، والمواطن من حقو يعرف شنو تحقق، شنو غادي يتدار، وشنو هو البرنامج… ماشي غير شحال من قصريّة تحطات فالعراضة!
196 قصريّة قد تكون مجرد عراضة عادية… ولكن إلا دخلات السياسة للمائدة، فهنا خاص المواطن يسول: فين البرنامج؟ فين الحصيلة؟ وفين الأفكار؟
وفي الأخير، القصريّة كتسالي فساعة… ولكن الاختيار الانتخابي كيبقى سنوات.
